Penderfyniad anodd oedd dewis parhau gyda’r rhifynnau digidol. Gyda nifer o bapurau bro yn dychwelyd i argraffu rhifynnau ar bapur roedd rhai yn teimlo y dylem ddilyn hynny. Barn y mwyafrif o’r tîm oedd y dylem barhau gyda’r rhifynnau digidol. O ystyried fod Sir Ddinbych wedi cychwyn ar gyfnod clo lleol ddiwrnod cyn cyhoeddi’r rhifyn hwn gwnaed y penderfyniad iawn. Hawdd yw ôl-ddoethineb ynte.
Rydym yn ymwybodol fod nifer o’n tanysgrifwyr heb fynediad i’r rhifynnau digidol. I gynorthwyo gyda hyn da ni am ychwanegu clawr i’r copi pdf yn seiliedig ar y dudalen hon a gwneud ymdrech pellach i sicrhau fod ein tanysgrifwyr yn cael cyfle i dderbyn hwnnw gan gyfeillion ac ati. Os ydych yn adnabod rhywun sydd angen copi a nad ydych yn gallu argraffu copi iddynt gadewch i ni wybod os gwelwch yn dda.
Cyfnod o brotestio!
Cymerodd mwy na un mudiad y cyfle ar ôl i’r cyfyngiadau cofid gael eu llacio i gynnal digwyddiadau yn y dre a’r ardal. Ymysg rhain oedd y seremoni ail-orchuddo cofeb H. M. Stanley a Baneri ar Bontydd (a chylchfannau!) Yes Cymru. Mae’n debyg na welwn ni fwy am gyfnod eto nes bydd pethau’n gwella o ran yr afiechyd dieflig yma. Mwy o hanes tu mewn!
